Komuna e Prishtinës, përmes Drejtorisë së Sportit, ka organizuar ceremoninë e ndarjes së çmimeve për sportistët më të dalluar dhe ngjarjet sportive më të rëndësishme të vitit 2024. Ky event, tashmë i përvitshëm, kishte për synim të vlerësojë sukseset dhe kontributin e sportistëve, trajnerëve dhe klubeve në zhvillimin e sportit në kryeqytet.
Dy lojtarë të talentuar të KPP Priping, Denat Makolli dhe Deti Konushevci, u vlerësuan me çmimin “Shpresa e Vitit – Meshkuj”. Ky çmim u nda për të njohur punën dhe përkushtimin e të rinjve premtues në sport, të cilët me rezultatet e tyre kanë dëshmuar një të ardhme të ndritur në pingpong.
Denat dhe Deti kanë treguar progres të jashtëzakonshëm gjatë vitit, duke përfaqësuar me dinjitet kryeqyetin dhe duke marrë pjesë në gara kombëtare e ndërkombëtare, ku kanë arritur rezultate të rëndësishme.
Poashtu një nga çmimet kryesore të ceremonisë ishte ai për “Ngjarjen më atraktive të vitit 2024”, të cilin e fitoi Klubi i Pingpongut Priping për organizimin e Prishtina Open Table Tennis International Tournament 2024 (POTTTIT).
